संसदमा गाँजा विधेयक दर्ता

Law Hub Nepal फागुन १९, २०७६

काठमाडौं । संसदमा गाँजा विधेयक दर्ता भएको छ। प्रतिनिधि सभाको विधेयक शाखामा आज सांसद शेर बहादुर तामाङले गाँजा विधेयक दर्ता गरेका हुन्।

गाँजा विधेयक नयाँ संविधान जारी भएपछिको पहिलो गैरसरकारी विधयेक हो। विधेयक दर्ता गरेपछि सांसद तामाङले गाँजा खेतीलाई खुल्ला गरेमा विदेसिएका नेपाली स्वदेश फर्कने र विदेशमा गाँजा निर्यात गरी मुलुकको आयआर्जन बढाउन सकिने बताए।

गाँजा बहुउपयोगी बनस्पति भएको भन्दै नेपालमा गाँजा खेतिलाई कसूर नहुने व्यवस्था गरी नियन्त्रित गाँजा खेति गर्ने व्यवस्था गर्न आवश्यक रहेकाले यो विधेयक दर्ता गरेको तामाङले जानकारी दिएका छन्।

नेपालमा खेती गरिने गाँजा अन्य मुलुकको भन्दा उच्च स्तरको रहेको मान्यता रही आएको छ।

गाँजाको उपयोग औषधि निर्माण तथा यसको बोक्राको रेसाबाट कपडा लगायतका समाग्रीको उत्पादन गर्न सकिने र डाँठको फर्निचर, वोर्ड तथा इट्टासमेतको लागि उपयोगि हुनसक्ने गुण रहेको हुन्छ ।

तामाङले गाँजा वा भाँगको दाना अचार खानाको लागि वा तेल निकाली प्रयोग गर्ने गरी खाद्य पदार्थको रुपमा उपयोग गर्न सकिनेे र साथै औषधीय गुण युक्त मह उत्पादन समेत हुनेे बताएका छन् ।

गाँजा खेतीबाट हरियाली वातावरण भइ जलवायु परिवर्तनलाई न्यून गर्न समेत सहयोग पुग्ने, किसानको आर्थिक स्तरमा सुधार ल्याउन सकिने जस्ता अनेकौं फाइदा रहेका उनको दावी छ ।

गाँजा खेतीलाई नियमन तथा व्यवस्थित गर्न र गाँजाको गैर कानुनी उत्पादन, बिक्रि वितरण तथा उपयोगलाई नियन्त्रण गर्ने सम्बन्धमा कानूनी व्यवस्था गर्न आवश्यक भएकोले यो विधेयक पेश गरेको तामाङले जानकारी दिएका छन् ।

 

तपाईंको प्रतिक्रिया व्यक्त गर्नुहोस् ।

विचार