अमेरिकी फिल्म खेल्दै केकी र स्वस्तिमा

Law Hub Nepal वैशाख २५, २०७७

काठमाडाैं । कोरोना कहरले विश्व ठप्प भएको बेला नेपाली रजतपटका दुई नायिकाको खुसीको खबर बाहिर आएको छ।

चलचित्र उद्योगमा निकै रुचाइएका नायिकाहरू स्वस्तिमा खड्का र केकी अधिकारीले अंग्रेजी फिल्ममा अभिनय गर्ने अवसर पाएका छन्। अहिलेसम्म नाम सार्वजनिक नगरिएको अमेरिकी चलचित्रका लागि उनीहरू आधिकारिक रूपमा अनुबन्धित भइसकेका छन्।

लक डाउन सुरु हुनुभन्दा अघि नै अडिसनमार्फत उनीहरूलाई छनोट गरिएको हो। केही समयअगाडि नेपाल आएको फिल्मको टिमले अडिसनबाट स्वस्तिमा र केकीलाई छनोट गरेको हो।

यो फिल्मका लागि अन्य केही नायिकाले पनि अडिसन दिएका थिए तर उनीहरूको नाम गोप्य राखिएको छ। स्वस्तिमा र केकीले आफ्नो क्षमता प्रदर्शन गरेर यो भूमिका पाएको बताइएको छ।

फिल्मको मुख्य भूमिकामा स्वस्तिमा हुनेछिन् भने उनकी दिदीको भूमिकामा केकी रहने बताइएको छ। यी दुईबाहेक अन्य कलाकार भने अमेरिकी नै हुने छन्।

कोरोना संक्रमणको जोखिम नभएको भए अहिले यो फिल्म फ्लोरमा जाने तयारीमा हुन्थ्यो। अब यसको छायांकन पछि धकेलिएको छ। कोरोना त्रास सकिएपछि यसको छायांकन सुरु गरिने बताइएको छ। फिल्मको छायांकन अमेरिकाका विभिन्न स्थानमा हुनेछ।

भुटानी शरणार्थीको विषयमा बन्न लागेको उक्त अमेरिकी फिल्म अमेरिकी निर्माताले बनाउन लागेका हुन्। यसका लागि दुई महिनाअघि उनीहरू नेपाल आएर अडिसन लिएका थिए। यो फिल्म भुटानी शरणर्थीको जीवन गाथामा आधारित हुने छ ।

नेपाली फिल्म उद्योगमा छोटो समयमा आफूलाई स्थापित गराउन सफल नायिका हुन् स्वस्तिमा। नृत्यमा पारंगत उनी र केकीले एक साथ अभिनय गरेको फिल्म नाईं नभन्नू ल– ५ सफल भएको थियो।

गत वर्ष प्रदर्शनमा आएको फिल्म बुलबुलमा उनको अभिनयको निकै तारिफ भएको थियो। स्वदेशमा मात्रै होइन यसमा उनले गरेको अभिनयलाई विदेशमा समेत पुरस्कृत गरिएको थियो। अन्तर्राष्ट्रिय फिल्म महोत्सवमा उनले अवार्ड जितेकी थिइन्। यो फिल्ममा उनले टेम्पो चालक युवतीको भूमिका निर्वाह गरेकी थिइन्।

केकी पछिल्लो समय कमेडी रियालिटी सो ‘कमेडी च्याम्पियन’ उत्पादनमा व्यस्त थिइन्। यो सोको फाइनलसँगै वल्र्ड टुरमा जाने तयारीमा रहेको भए पनि कोरोना भाइरसले उनको यात्रा रोकियो। त्यसयता उनी फिल्ममा भने देखिएकी छैनन्।

तपाईंको प्रतिक्रिया व्यक्त गर्नुहोस् ।

विचार